ភ្នំពេញ៖ ស្ពានបេតុងខ្សែកាបឫស្សីកែវ នឹងត្រូវដាក់សម្ពោធប្រើប្រាស់ជាផ្លូវការនៅថ្ងៃទី៣១ ខែឧសភា ឆ្នាំ២០២៣ ក្រោមអធិបតីភាពនាយករដ្ឋមន្ត្រីកម្ពុជា សម្តេចតេជោ ហ៊ុន សែន។ រដ្ឋបាលរាជធានីភ្នំពេញ នឹងផ្អាកចរាចរជាបណ្តោះអាសន្ននូវយានយន្តគ្រប់ប្រភេទឆ្លងកាត់ស្ពាន និងឆ្លងកាត់ទន្លេសាបជុំវិញទីតាំងប្រារព្ធពិធីចាប់ពីម៉ោង២រសៀលថ្ងៃទី៣០ ដល់ថ្ងៃបញ្ចប់កម្មវីធីថ្ងៃទី៣១ ខែឧសភា ឆ្នាំ២០២៣។
រដ្ឋបាលរាជធានីភ្នំពេញផ្អាកចរាចរបណ្តោះអាសន្ន ដើម្បីដើម្បីឱ្យកម្មវិធីខាងលើប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ។ រដ្ឋបាលរាជធានីភ្នំពេញ សុំការយោគយល់អធ្យាស្រ័យ និងសូមឱ្យពលរដ្ឋបញ្ចៀសការធ្វើដំណើរឆ្លងកាត់ទីតាំងប្រារព្ធពិធីតាមកាលបំរិច្ឆេទខាងលើដោយអនុគ្រោះ។ ពេលផុតរយៈពេលហាមឃាត់បណ្តោះអាសន្ននេះ រដ្ឋបាលរាជធានីភ្នំពេញនឹងបើកឱ្យចរាចរជាធម្មតាវិញ។
ស្ពានបេតុងឫស្សីកែវ ត្រូវបានរាជរដ្ឋាភិបាលអនុញ្ញាតឱ្យបើកដំណើរការជាបណ្តោះអាសន្ននៅថ្ងៃទី១០ ខែមេសា ឆ្នាំ២០២៣ ខណៈស្ពានដែកបាឡេឫស្សីកែវ ត្រូវបានបិទមិនឱ្យចរាចរតទៅទៀតទេ។
គូសបញ្ជាក់ថា ស្ពានបេតុងឫស្សីកែវ ឆ្លងទន្លេសាប ស្ថិតនៅខណ្ឌជ្រោយចង្វារ និងខណ្ឌឫស្សីកែវ រាជធានីភ្នំពេញ ត្រូវបានបើកការដ្ឋានសាងសង់ កាលពីខែតុលា ឆ្នាំ២០១៧ ក្រោមអធិបតីភាពនាយករដ្ឋមន្ត្រីកម្ពុជាសម្តេចតេជោ ហ៊ុន សែន និងទទួលការសាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC)៕